თვე: ივნისი 2022

ქვეშეთი-კობის ახალი გზის პროექტის მხარდაჭერითა და ორგანიზებით, ადგილობრივი მოსახლეობის მხარდაჭერისა და სოციალური დაცვის პროგრამის ფარგლებში, ხადის ხეობის მოსახლეობას უფასო სამედიცინო პროფილაქტიკური შემოწმება ჩაუტარდა.

9 ივნისს, ხადის ხეობას კლინიკა „რემედიქალის“ სხვადასხვა პროფილის ექიმები ეწვივნენ და მთელი დღის განმავლობაში, ქვეშეთის ამბულატორიულ ცენტრში მსურველებს კონსულტაციას უწევდნენ. უფასო კონსულტაციები ჩაატარეს შემდეგი პროფილის ექიმებმა: ტრიაჟის ექიმი, თერაპევტი, კარდიოლოგი, ენდოკრინოლოგი, ნევროლოგი, ზოგადი ქირურგი, სისხლძარღვთა ქირურგი, ექიმი-ექოსკოპისტი.

 

 

ქვეშეთის ამბოლატორიული ცენტრი მომარაგებული იყო სხვადასხვა მედიკამენტითაც, რომლებიც, საჭიროების მიხედვით გადაეცათ ადგილობრივებს.

“საქართველოს რეგიონების მოსახლეობის უფასო გასინჯვას ლოზუნგით – “ერთად ვიზრუნოთ ჯანმრთელობაზე!” – რეგულარულად აწარმოებს კლინიკა “რემედიქალი”. მათი სამედიცინო საჭიროებების გაცნობა და ადგილზე მაქსიმალური დახმარების გაწევა მნიშვნელოვანია ჩვენი საექიმო გუნდის ყველა წევრისთვის,” – ამბობს კლინიკა “რემედიქალის” კლინიკური მენეჯერი, მედიცინის დოქტორი თეა გამეზარდაშვილი.

ჯამში აქციაში მონაწილეობა 70-ზე მეტმა ბენეფიციარმა მიიღო. ბენეფიციარები გამოვლინდნენ წინასწარი კვლევით, რომელიც ხადის ხეობაში „რეგიონული განვითარების ახალგაზრდულმა ცენტრმა“ ჩაატარა.

 

 

„ხადის ხეობაში მოსახლეობისთვის უფასო სამედიცინო კონსულტაცია/შემოწმებას, ქვეშეთი-კობის ახალი გზის პროექტის ფარგლებში უკვე მეორედ ვატარებთ. მნიშვნელოვანია, ადგილობრივ მოსახლეობას მსგავსი ტიპის მომსახურება მივაწოდოთ, რადგან, გზის არარსებობის გამო, ხადის ხეობის მკვიდრთა უმეტეს ნაწილს არ აქვს წვდომა სოციალურ სერვისებზე, მათ შორის, მაგალითად, სამედიცინო სერვისზე. ქვეშეთი-კობის ახალი გზა, ბევრ სხვა პრობლემასთან ერთად, ამ საკითხსაც სრულად მოაგვარებს. მანამდე კი, პროექტის მიმდინარეობისას, ვეცდებით, მსგავსი აქციებით დავეხმაროთ აქ მცხოვრებ ადამიანებს,“ – განაცხადა საქართველოს საავტომობილო გზების დეპარტამენტის თავმჯდომარის მოადგილემ, სალომე წურწუმიამ.

აღნიშნული აქცია პენსიონერების მხარდაჭერის პროგრამის ნაწილია, რომელიც საქართველოს მთავრობის ადმინისტრაციის რეგიონებთან ურთიერთობის დეპარტამენტის უშუალო ჩართულობით განხორციელდა.

 

ქვეშეთის სკოლაში საგანმანათლებლო გარემოსდაცვითი პროექტის დასკვნითი ღონისძიება ჩატარდა. ქვეშეთი-კობის ახალი გზის პროექტის ფარგლებში, ქვეშეთის სკოლაში ფუნქციონირებს „ეკოკლუბი“, რომლის წევრებმაც, 7 ივნიისს, გარემოსდაცვითი ორგანიზაცია „ეკოხედვის“ წარმომადგენლების შემეცნებითი სალექციო კურსი დახურეს.

გარდა ამისა, სკოლის ეზოში „ეკოკლუბის“ ფარგლებში გამართული ნახატების კონკურსის გამოფენა მოეწყო. მონაწილეებს სამახსოვრო საჩუქრები და სიგელები გადაეცათ. ჯამში, კონკურსში მონაწილეობა 20-მდე ბავშვმა მიიღო, რომლებიც ქვეშეთის სკოლის V-XI კლასელები არიან.

 

 

„გვიხარია, რომ პროექტში ქვეშეთის საჯარო სკოლის მოსწავლეების უმეტესი ნაწილი ჩაერთო. ისინი აქტიურად ესწრებოდნენ და უსმენდნენ ჩატარებულ ლექციებს გარემოს დაცვასთან დაკავშირებით, იღებდნენ მონაწილეობას სხვადასხვა აქტივობებსა თუ ტრენინგებში, იმყოფებოდნენ ექსკურსიაზე და ნახეს, თუ როგორ მუშაობს გვირაბის საბურღი მანქანა TBM. ეს საკმაოდ შთამბეჭდავი იყო მათთვის. ასეთი საინფორმაციო-საგანმანათლებლო პროექტები მნიშვნელოვანი და აუცილებელია მოსახლეობის სწორი ინფორმირებისთვის, გარემოს დაცვის, მიმდინარე პროექტებისა და დაგეგმილი სიახლეების შესახებ,“ – აცხადებს „ეკოხედვის“ აღმასრულებელი დირექტორი გეგი სოფაძე.

საგანმანათლებლო გარემოსდაცვითი პროექტის მთავარი მიზანია ხადის ხეობის მოსახლეობის სწორი ინფორმირება და ცნობიერების ამაღლება ინფრასტრუქტურულ და გარემოსდაცვით საკითხებზე. ჯამში, პროექტის ფარგლებში, ქვეშეთის სკოლის უფროსკლასელებს 5 ლექცია ჩაუტარდათ. ასევე, ჩატარდა გამწვანების აქცია და ექსკურსია ქვეშეთი-კობის ახალი გზის მშენებლობის ობიექტებზე, მათ შორის, ყველაზე დიდი, 9 კმ-იანი გვირაბის მშენებლობაზეც. სალექციო კურსის ბოლოს კი სკოლის მოსწავლეები ნახატების კონკურსში ჩაერთვნენ.

“ახალგაზრდებისთვის გარემოსდაცვითი საგანმანათლებლო პროექტების განხორციელება ძალიან მნიშვნელოვანია. ეკოკლუბის პროექტი წარმატებული აღმოჩნდა, რადგან ქვეშეთის სკოლის საკმაოდ ბევრი მოსწავლე და მასწავლებელი ჩაერთო. გარდა იმისა, რომ მათ მიიღეს ინფორმაცია სხვადასხვა გარემოსდაცვითი საკითხის შესახებ, ჩაატარეს სხვა არაერთი საინტერესო აქტივობაც, როგორიცაა, მაგალითად ექსკურსიები. მათ ნახეს, თუ როგორ მუშაობს გვირაბგამყვანი დანადგარი TBM, რაც საკმაოდ შთამბეჭდავი სანახაობა იყო მათთვის. ასევე, დაათვალიერეს კულტურული მემკვიდრეობის ობიექტები, დაესწრნენ არქეოლოგიურ სამუშაოებს და ნახეს, თუ რა პროცედურები სჭირდება ობიექტების აღრიცხვასა და დაცვას. იმედი გვაქვს, ეკოკლუბი ფუნქციონირებას გააგრძელებს. ჩვენ კი, ქვეშეთი-კობის ახალი გზის პროექტის ფარგლებში, არაერთ საინტერესო ინიციატივას შევთავაზებთ ადგილობრივ მოსახლეობას,“ – განაცხადა საქართველოს საავტომობილო გზების დეპარტამენტის თავმჯდომარემ, გიორგი წერეთელმა.

„ეკოხედვის“ წარმომადგენლებთან ერთად, ეკოკლუბმა შეიმუშავა ერთწლიანი სამოქმედო გეგმა, რომელიც გულისხმობს ქვეშეთის სკოლის მიმდებარე ტერიტორიების გამწვანებაზე ზრუნვას, სკოლის ეზოსა და მიმდებარე ტერიტორიების დასუფთავების აქციებს, ინტელექტუალური თამაშების ორგანიზებას გარემოსდაცვით თემებზე და ა.შ.