საქართველოში უხვი ნალექის გამო პრობლემები შეიქმნა გზებზე, მათ შორის ქუთაისი-წყალტუბო-ცაგერის, ხაშური-ახალციხის, ზუგდიდი-მესტიის მონაკვეთებზე და კობი-გუდაურის გზაზე. ჩამოთვლილთაგან ამ დრომდე მძიმე ვითარებაა კობი-გუდაურის გზაზე. დანარჩენ მონაკვეთებზე კი საავტომობილო მოძრაობა უკვე აღდგენილია.
კობი-გუდაურის გზა უხვი თოვლის გამო უკვე მესამე დღეა ჩაკეტილია. მოძრაობა აკრძალულია როგორც სატვირთო, ასევე – მსუბუქი ავტომობილებით. შექმნილი სიტუაციიდან გამომდინარე, ხელისუფლებამ მიიღო გადაწყვეტილება, ადგილობრივი მოსახლეობისა და მსურველების გადასაყვანად საბაგიროები გამოიყენოს, თუმცა, ძლიერი ქარის გამო, ამ ეტაპზე ესეც ვერ ხერხდება. შესაბამისად, ადგილობრივი მოსახლეობა კვლავ მოწყვეტილია ქვეყნის დანარჩენ რეგიონებს.
ეს არ არის პირველი შემთხვევა, როდესაც რთული მეტეოროლოგიური და კლიმატური პირობების გამო, გუდაური-კობის გზა იკეტება. ინფრასტრუქტურის სამინისტროში ამბობენ, რომ ამ ტერიტორიაზე ძალიან ხშირად პრობლემები იქმნება როგორც ადგილობრივების გადაადგილების თვალსაზრისით, ასევე – ტვირთების გადაზიდვის კუთხითაც.
„მსგავსი სიტუაცია ამ მონაკვეთზე საკმაოდ ხშირია. ყოველწლიურად, რთული კლიმატური პირობების გამო, ეს გზა იკეტება და იქმნება საკმაოდ ბევრი პრობლემა. ამის ყველაზე თვალსაჩინო მაგალითი იყო გასული წლის მარტი, როდესაც ქვეყანაში ეპიდვითარება გართულდა, პანდემიას ვებრძოდით და რეგიონში მცხოვრებ მოსახლეობას სასურსათო მომარაგების პრობლემაც კი შეექმნა. იმისათვის, რომ მსგავსი ფაქტები აღარ განმეორდეს, ერთადერთი და უალტერნატივო გამოსავალია ახალი გზის მშენებლობა. სწორედ ეს ახალი გზა იქნება გარანტი, რომ გადაადგილების შეფერხება აღარ მოხდება და მოძრაობა 12 თვის განმავლობაში თავისუფლად იქნება შესაძლებელი“, – განმარტავს საავტომობილო გზების დეპარტამენტის თავმჯდომარის მოადგილე გიორგი წერეთელი.
როგორც საქართველოს საავტომობილო გზების დეპარტამენტში ამბობენ, ქვეშეთი-კობის ახალი გზის პროექტის მიზანია, შესაძლებელი გახადოს უწყვეტად და უსაფრთხოდ გადაადგილება წელიწადის ნებისმიერ დროს და გააუმჯობესოს რეგიონში სოციალურ-ეკონომიკური და ეკოლოგიური სიტუაცია. ახალი გზით შემცირდება გადაადგილების დრო და ხარჯები, გაუმჯობესდება მოძრაობის უსაფრთხოება და ადგილობრივი მოსახლეობა აღარ იქნება მოწყვეტილი საქართველოს დანარჩენ რეგიონებს.
ქვეშეთი-კობის ახალი გზის პროექტის ფარგლებში იგეგმება 23 კმ სიგრძის, 2 ზოლიანი ასფალტ-ბეტონის გზის, 5 ხიდისა და 5 გვირაბის მშენებლობა და 1 ხიდის რეაბილიტაცია, ასევე, საცალფეხო გადასასვლელების, საფეხმავლო ბილიკების, ქვეითთა/პირუტყვთა გადასასვლელების მოწყობა.
წყარო: Pia.ge
